نوشی گیلانی 5

محّبت کی دُعائیں مانگتی شب نے

نئے اِک سُرخ رو دن کے سُہانے خواب

دیکھے ہیں

یہ کیسا خُوشنما احساس ہے

آئندہ برسوں میں

ہر اِک موسم ، ہر اک دن کی دھنک

کرنوں کو

ہم اِک ساتھ برتیں گے

سُنو!یہ خُوشبوئیں اعلان کرتی ہیں

****************************************

تُم سے کُچھ نہیں کہنا

ہم نے سوچ رکھا ہے

چاہے دل کی ہر خواہش

زندگی کی آنکھوں سے اشک بن کے

بہہ جائے

چاہے اب مکینوں پر

گھر کی ساری دیواریں چھت سمیت گِر جائیں

اور بے مقّدر ہم

اس بدن کے ملبے میں خُود ہی کیوں نہ دَب جائیں

تم سے کُچھ نہیں کہنا

کیسی نیند تھی اپنی ، کیسے خواب تھے اپنے

اور اب گلابوں پر

نیند والی آنکھوں پر

نرم خُو سے خوابوں پر

کیوں عذاب ٹوٹے ہیں

تم سے کچھ نہیں کہنا

گھِر گئے ہیں راتوں میں

بے لباس باتوں میں

اِس طرح کی راتوں میں

کب چراغ جلتے ہیں، کب عذاب ملِتے ہیں

اب تو اِن عذابوں سے بچ کے بھی نکلنے کا راستہ نہیں جاناں!

جس طرح تمھیں سچ کے لازوال لمحوں سے واسطہ نہیں جاناں

ہم نے سوچ رکھا تُم سے کُچھ نہیں کہنا

****************************************

آخری خواہش

مِرے ساتھی

مِری یہ رُوح میرے جسم سے پرواز کر جائے

تو لوٹ آنا

مِری نے خواب راتوں کے عذابوں پر

سسکتے شہر میں تُم بھی

ذرا سی دیر کو رُکنا

مِرے بے نُور ہونٹوں کی دُعاؤں پر

تُم اپنی سرد پیشانی کا پتھر رکھ کے رو دینا

بس اِتنی بات کہہ دینا

’’مجھے تُم سے محّبت ہے ‘‘

****************************************

میں تو ایک قدم چل کر ہی رُوح تلک تھک جاتی ہوں

سوچتی ہوں تم اپنے آپ سے اِتنا کیسے بھاگتے ہو

***************************************

میری آنکھوں کو سُوجھتا ہی نہیں

یا مقدّر میں راستہ ہی نہیں

وہ بھرے شہر میں کِسی سے بھی

میرے بارے میں پُوچھتا ہی نہیں

پھر وُہی شام ہے وُہی ہم ہیں

ہاں مگر دِل میں حوصلہ ہی نہیں

ہم چلے اُس کی بزم سے اُٹھ کر

اور وہ ہے کہ روکتا ہی نہیں

دل جو اِک دوست تھا مگر وہ بھی

چُپ کا پتھّر ہے بولتا ہی نہیں

مَیں تو اُس کی تلاش میں گُم ہوں

وہ کبھی مُجھ کو ڈھونڈتا ہی نہیں

****************************************

بے نام اُلجھن

یہ کیا بے نام اُلجھن ہے

نجانے آگہی اور خواب کے مابین کیسا مسئلہ ہے

کہ ہر تخلیق سے پہلے

عجب اِک خوف دل کو گھیر لیتا ہے

مجھے محسوس ہوتا ہے

میں اپنی آخری تحریر لکھنے جا رہی ہوں

سخن کی شب کے ماتھے پر

وہ میرے نام کے جتنے ستارے تھے

وفا کے اِستعارے تھے

سب اپنی عُمر پُوری کر چکے ہیں

****************************************

وہ تیرگی تھی لفظوں کو راستہ نہ ملا

کوئی چراغ قبیلہ مرے ہُنر کے لیے

***************************************

دل پر ہوتے جبر ابھی دیکھے ہی نہیں ہیں

تم نے اہلِ صبر ابھی دیکھے ہی نہیں ہیں

***************************************

سوچ رہے ہیں صبح تلک اِک بار بھی آنکھ نہیں جھپکی

اب تو تیرے ہجر میں ہم نے پہلی رات گزاری ہے

**************************************

قریب تھا تو کسے فُرصت محبّت تھی

ہُوا ہے دُور تو اُس کی وفائیں یاد آئیں

****************************************

آج دیکھو زمیں کے سینے پر

اُس کے چہرے کی دھوپ پھیلی ہے

***************************************

خیال و خواب کے منظر سجانا چاہتا ہے

یہ دل کا اِک تازہ بہانہ چاہتا ہے

**************************************

روشنیوں کے سارے منظر جھُوٹے لگتے ہیں

لیکن اُس کی آنکھ کے آنسو سچے لگتے ہیں

***************************************

اِک چادر سخن ہی بچا کر نکل چلیں

رستہ مِلے تو شہر سے باہر نکل چلیں

****************************************

مرقدِ عشق پہ اَب اور نہ رویا جائے

رات کا پچھلا پہر ہے چلو سویا جائے

***************************************

ہجر کی شب میں قید کرے یا صُبحِ وصال میں رکھے

اچھّا مولا!تیری مرضی تُو جس حَال میں رکھے

***************************************

تم نے تو کہ دیا کہ محبت نہیں ملی

 مجھ کو تو یہ کہنے کی بھی مہلت نہیں ملی

نیندوں کے دیس جاتے کوئی خواب دیکھتے

 لیکن دیا جلانے سے فرصت نہیں ملی

تجھ کو تو خیر شہر کے لوگوں کا خوف تھا

 اور مجھ کو اپنے گھر سے اجازت نہیں ملی

پھر اختلافِ رائے کی صورت نکل پڑی

 اپنی یہاں کسی سے بھی عادت نہیں ملی

بیزار یوں ہوئے کہ تیرے عہد میں ہمیں

سب کچھ ملا سکون کی دولت نہیں ملی

************************************